Gen. Maj. Cirimwami yishwe ku wa 24 Mutarama 2025, mu gihe Ingabo za Repubulika ya Demokarasi ya Congo zari zihanganye n’abarwanyi ba M23 mu Mujyi wa Sake n’inkengero zawo.
Cirimwami wavukiye mu bwoko bw’Abashi mu Mujyi wa Bukavu, icyo gihe yari yagiye gutera ingabo mu bitugu abasirikare ba Leta.
Nyuma y’iminsi micye uwo musirikare mukuru wari umwizerwa wa Tshisekedi amaze kwicwa, umutwe wa M23 wahise ufata Umujyi wa Goma.
Urupfu rwe ntirwavuzweho rumwe, igisirikare cyatangaje ko “yishwe n’umwanzi,” mu muryango we bamwe bavuga ko “yarashwe n’abo ku ruhande rwe.”
Ku wa Mbere, tariki ya 1 Nzeri 2025, imbere ya Perezida Félix Tshisekedi, Minisitiri w’Ingabo n’abasirikare bakuru, yasezeweho bwa nyuma.
Muri uwo muhango, isanduku iriho ifoto ya Cirimwami yari irikumwe n’indi ya Colonel Rugabisha Alexis, wiciwe ku rugamba ku ya 1 Gashyantare 2025 i Nyabibwe muri Kivu y’Epfo.
Aba bombi barasiwe ku rugamba ubwo intambara hagati y’ingabo za Leta n’umutwe wa M23 yari igeze ahakomeye mu Ntara za Kivu y’Amajyaruguru no mu Kivu y’Epfo.
Aba basirikare bombi bashyizwe mu rwego rw’intwari za DRC ruzwi nka “Héros nationaux Kabila-Lumumba”.
Ibiro bya perezida wa Congo bivuga ko Cirimwami yahawe ipeti rya Lieutenant-général naho Rugabisha wahoze ari Colonel agahabwa ipeti rya Général de brigade.
FARDC yavuze ko ari intwari zahagaze zishikamye ku rugamba, zitanga ubuzima bwazo mu kurengera igihugu no kubungabunga ubusugire bw’abaturage ba Congo.
Perezida Tshisekedi yavuze ko Cirimwami “yabayeho kandi arwana nk’umusirikare, yapfuye nk’umusirikare, ari gusohoza inshingano z’ikirenga”.
Umukuru w’igihugu cya RDC yavuze kandi ko Col. Rugabisha yari mu ngabo zakomeje urugamba mu mutuzo no mu kutagamburuzwa.
Uyu Rugabisha, wo mu bwoko bw’Abanyamulenge, yarasiwe i Nyabibwe muri teritwari ya Kalehe, ubwo abarwanyi ba M23 berekezaga i Bukavu nyuma yo gufata Goma.
Bamwe bavuga ko yarashwe n’abarwanyi ba M23, abandi bakemeza ko yarashwe n’ingabo yari ayoboye zimushinja ubugambanyi.
Perezidansi ya RDC yanditse kuri X ko Perezida Tshisekedi yavuze ko bazakurikirana abantu bose bagize uruhare, abari inyuma ndetse n’abafashije mu bikorwa by’ibyaha ku Banye-Congo.
Yagize ati: “Tuzubaha abacu bapfuye dukora mu guhozaho, ikinyabupfura no kubahiriza inshingano.”
Aba basirikare bashyinguwe mu irimbi rishya rya gisirikare, ryafunguwe na Perezida Tshisekedi, ryitwa “Repos du soldat”, riri muri Komine N’sele i Kinshasa.
