Kaminuza ya Oxford na Cambridge ntizagaragaye mu mashuri makuru atatu ya mbere akomeye mu Bwongereza.
Ni urutonde rwa The Times rukorwa hashingiwe ku ireme ry’uburezi butangwa, ubunararibonye bw’abanyeshuri, n’amahirwe yo kubona akazi nyuma yo kurangiza.
Ku nshuro ya mbere mu mateka y’imyaka 32 y’uru rutonde, izi kaminuza ebyiri ziri mu zikuze kandi zifite izina rikomeye mu Bwongereza ntizabashije kuza muri eshatu za mbere, kuko zasubiye inyuma zikaza ku mwanya wa kane.
London School of Economics yaje ku mwanya wa mbere ku nshuro ya kabiri yikurikiranya, St. Andrews iza ku mwanya wa kabiri, naho Durham University iza ku mwanya wa gatatu.
Uru rutonde rwahaye Durham izina rya Kaminuza y’Umwaka wa 2026 nyuma yo kuva ku mwanya wa gatanu ikazamuka ikagera k’uwa gatatu.
Umwaka ushize, Oxford yari ku mwanya wa gatatu, naho Cambridge yari ku mwanya wa kane.
Nubwo Cambridge yasubiye inyuma ku rutonde rusange, yakomeje kwitwara neza mu bijyanye n’amasomo, aho yayoboye mu masomo 14 atandukanye.
Oxford yahawe izina ry’ishuri ry’ubuvuzi ry’umwaka wa 2026, nk’uko byatangajwe na The Times.
Ni ishuri kandi ryahuye n’igitutu mu minsi ishize nyuma y’uko Perezida mushya w’itsinda ry’abanyeshuri bakora ibiganiro mpaka, George Abaraonye, agaragaje ku mbuga nkoranyambaga ko yishimiye iyicwa rya Charlie Kirk.
