Inama y’Umuryango w’Abibumbye ishinzwe umutekano (UNSC), yanze umushinga w’itegeko washyigikiwe n’u Burusiya n’u Bushinwa ugamije kongerera Iran amezi atandatu idahabwa ibihano.
Uyu mushinga washyigikiwe n’ibihugu bine ari byo u Bushinwa, u Burusiya, Pakistan na Algeria, ibihugu icyenda biwutera utwatsi, naho bibiri birifata mu matora yabaye ku wa Gatanu, tariki ya 26 Nzeri 2025.
Ibi bivuze ko ibihano byari byarakuweho hashingiwe ku masezerano yo mu 2015 hagati ya Iran n’ibihugu bikomeye ku Isi yiswe ‘JCPOA’, byongeye gusubukurwa kuko Iran itubahirije amasezerano y’itegeko rya ‘Snapback Mechanism’ ryashyizweho umukono n’u Bufaransa, u Budage n’u Bwongereza.
‘Snapback Mechanism’, ni rimwe mu mategeko yari akubiye muri ayo masezerano ya JCPOA’, rivuga ko mu gihe Iran yarenga kuri ayo masezerano, ibihano yahawe bihita bisubukurwa nta mananiza.
Ambasaderi w’ungirije w’u Burusiya muri UN, Dmitry Polyansky, yavuze ko igihugu cye cyamaganye ibyavuzwe na Paris, Berlin na London byo gukoresha uburyo bwa ‘Snapback Mechanism’.
Yavuze ko ibihugu byo mu Burengerazuba byamaze imyaka byerekana ko bishaka igisubizo cya dipolomasi ku kibazo cya Iran, ariko byose byari ukwiyerurutsa.
Muri Kamena, ingabo za Leta Zunze Ubumwe za Amerika n’iza Israel zagabye ibitero ku bigo bya Iran bikorerwamo intwaro za kirimbuzi, zivuga ko byari mu rwego rwo gukumira iki gihugu ku gukomeza gukora intwaro za kirimbuzi.
Minisitiri w’Ububanyi n’Amahanga wa Iran, Abbas Araghchi, yavuze ko isubukurwa ry’ibi bihano ari urugero rubi rushobora gutuma ako kanama k’Umuryango w’Abibumbye gashinzwe umutekano gatakarizwa icyizere.
Yongeyeho ko ibihugu by’i Burengerazuba bikora ibikorwa binyuranyije n’amategeko bishingiye ku iterabwoba, avuga ko Iran itazigera yemera gushyirwaho igitutu cyangwa ngo itotezwe.
