Abana babarirwa mu bihumbi 19 ni bo bamaze kwicirwa mu ntambara ihanganishije umutwe wa Hamas na Israel, mu gihe abarenga ibihumbi 62 bapfuye muri rusange.
Iyi mibare yatangajwe n’Ibiro bishinzwe Itangazamakuru muri Gaza, ije nyuma y’aho Ishami rya Loni rishinzwe kwita ku mpunzi zo muri Palestine, UNRWA ku wa 19 Nyakanga 2025 ryatangaje ko nta hantu harindiwe umutekano abana bahungishirizwa.
Ibigo by’amashuri agenzurwa na Loni ubu ni yo yashyizwemo abaturage batakigira aho kuba kubera ibitero simusiga Israel imaze hafi imyaka ibiri igaba ku mutwe wa Hamas.
Loni igaragaza ko n’aho hantu yacumbikiye aba baturage na ho ibitero bya Israel byahageze bihitana ubuzima bw’ibihumbi by’abarimo n’abana.
Mu itangazo UNRWA yashyize hanze yakomeje iti “Nta hantu na hamwe muri Gaza hatekanye hahungishirizwa abana. Hakenewe agahenge byihutirwa.”
Ishami rya Loni ryita ku bana, UNICEF rigaragaza ko mu mezi atanu ashize nyuma y’aho Israel yongeye kugaba ibitero, ubwo agahenge kashyizweho kari karangiye, abana 540 bicwa buri kwezi.
Imibare igaragaza ko ku wa 19 Kanama 2024 honyine hishwe Abanye-Palestine 51 baguye mu bitero bya Israel, umunani muri bo bagerageza kujya ahagenewe gufata ibiribwa. Kuva muri Gicurasi 2025 abana 2000 bishwe bajya gushaka icyo barya.
Israel iherutse gutangaza ko igiye gukaza ibitero mu Mujyi wa Gaza kugira ngo iwugenzure burundu ndetse itangaza ko abatuye muri ibyo bice n’ibindi batangira kwimurira mu Majyepfo ya Gaza.
Qatar isanzwe ari umuhuza muri iyi ntambara iherutse gutangaza ko Hamas yemeye ko hashyirwaho agahenge k’iminsi 60 nta mirwano ndetse hagahererekanwa imfungwa n’abashimuswe ku mpande zombi.
Israel yatangaje ko iri gusuzuma ubwo busabe ariko amakuru akavuga ko ishaka ko abaturage bayo bose bashimuswe ko bayihererwa rimwe baba abazima n’abishwe.
Abaturage 56 bo muri Gaza bishwe n’ibitero bya Israel mu masaha 24 gusa. Batatu muri bo bishwe n’inzara.
Nubwo Israel ikomeje gukaza ibitero mu Mujyi wa Gaza abo mu miryango ikomokamo abashimuswe na Hamas bakomeje kugaragaza ko icyo gikorwa kizagira ingaruka zikomeye kuri bene wabo bari basigaye ari bazima.
Uretse abarenga ibihumbi 62 bamaze kwicirwa muri Gaza abarenga ibihumbi 150 ni bo bamaze kubikomerekeramo.
Intambara hagati ya Hamas na Israel yatangiye ku wa 7 Ukwakira 2023. Uyu mutwe wari wagabye ibitero kuri Israel bihitana abagera ku 1200 abandi barenga 250 barashimutwa.
