Amerika yashyizeho ibihano kuri bamwe mu bacamanza n’abashinjacyaha b’Urukiko Mpuzamahanga Mpanabyaha (ICC) bashinjwa kugira uruhare mu gukurikirana imanza zerekeye abasirikare b’Abanyamerika n’abayobozi ba Israel.
Itangazo rya Minisiteri y’Ububanyi n’Amahanga ya Amerika ryasohotse ku wa 20 Kanama 2025 rivuga ko Umucamanza Kimberly Prost yashyizwe ku rutonde rw’abafatiwe ibihano kubera ko yemeye iperereza rya ICC ku myitwarire yaranze zimwe mu Ngabo za Amerika muri Afghanistan.
Ni mu gihe Umucamanza Nicolas Yann Guillou we yashyiriweho ibihano kubera gusohora impapuro zo guta muri yombi Minisitiri w’Intebe wa Israel, Benjamin Netanyahu, hamwe n’uwahoze ari Minisitiri w’Ingabo z’iki gihugu, Yoav Gallant, bashinjwa ibyaha by’intambara muri Gaza.
Yavuze ko kuri urwo rutonde hongeweho abashinjacyaha bungirije barimo Nazhat Shameem Khan na Mame Mandiaye Niang na bo bashyizwe ku rutonde rw’abafatiwe ibihano kubera ko bashyigikiye izo mpapuro zo guta muri yombi abo bayobozi.
Icyakora yaba Amerika cyangwa Israel nta na kimwe kiri muri ICC.
ICC yamaganye ibyo bihano, irakomeza iti “Ni igitero gikomeye kigabwe ku ngingo y’ubwigenge bwa ICC ku gutanga ubutabera bunoze hashingiwe ku masezerano yashyizweho umukono n’ibihugu 125 binyamuryango.”
Muri Gashyantare Donald Trump ni bwo yafatiye ICC ibihano bwa mbere, avuga ko ari urukiko rutemewe n’amategeko ndetse rwibanda ku bikorwa bidafite ishingiro bigamijwe kurwanya, Amerika n’inshuti yayo ikomeye ya Israel.”
Mu 2024, ICC yashyize Netanyahu na Gallant ku rutonde rw’abantu bashakishwa, nyuma yo gusanga hari “impamvu zumvikana” zigaragaza ko Israel yakumiriye imfashanyo n’ubutabazi byagombaga guhabwa abo muri Gaza.
Netanyahu na we yamaganye impapuro zo kumufata agaragaza ko ICC yasaritswe n’urwango ifitiye Abayahudi.
Israel yatangije intambara kuri Gaza mu Ukwakira 2023 nyuma y’iguhe gito Umutwe wa Hamas uyigabyeho ibitero bigahitana abagera ku 1200 ndetse ugashimuta abarenga 200.
Kuva icyo gihe abaturage bo muri Gaza barenga ibihumbi 62 bamaze kuhasiga ubuzima barimo abana bakababaka ibihumbi 19. Ibitero bya Israel bimaze gukomeretsa abo muri gaza barenga ibihumbi 150.
