Bernard Makuza wabaye Minisitiri w’Intebe w’u Rwanda ni we uyoboye indorerezi z’Umuryango wa Afurika Yunze Ubumwe, AU, zagiye gukurikirana imigendekere y’amatora ya Perezida muri Cameroun.
Izi ndorerezi zageze muri iki gihugu ku wa ku wa 7 Ukwakira 2025, aho zagiye gukurikirana imyiteguro n’imigendekere y’amatora ya Perezida azaba ku wa 12 Ukwakira 2025.
Bernard Makuza wahoze ari Minisitiri w’Intebe akanayobora Sena y’u Rwanda, ni we uyoboye izo ndorerezi 40 zaturutse mu bihugu bitandukanye bya Afurika.
Abo barimo abagize Inteko Ishinga Amategeko ya Afurika (Pan-African Parliament), abahagarariye ibihugu byabo muri AU i Addis Abeba, abakozi b’inzego zishinzwe amatora, abanyamuryango b’imiryango itegamiye kuri Leta (CSOs), abanyamakuru n’abanyeshuri b’inzobere muri politiki n’amatora.
Izo ndorerezi zaturutse mu bihugu 28 bya Afurika.
Indorerezi za AU zizaba ziri muri Cameroun kugeza ku wa 16 Ukwakira 2025, umunsi zizasoza ubutumwa bwazo.
Mu matora ya Perezida wa Cameroun ateganyijwe kuba ku wa 12 Ukwakira 2025, Paul Biya, umaze imyaka irenga 43 ku butegetsi ari mu bahabwa amahirwe yo gutsinda.
Uyu mukambwe w’imyaka 92 y’amavuko yemeje ko azongera kwiyamamaza, ahagarariye ishyaka rye, Rassemblement Démocratique du Peuple Camerounais (RDPC).
Nubwo bamwe mu baturage basaba impinduka, Biya benshi bamuha amahirwe menshi yo kongera gutsinda.
Ku ruhande rw’abatavuga rumwe n’ubutegetsi, amazina nka Cabral Libii, uhagarariye Parti Camerounais pour la Réconciliation Nationale (PCRN), akomeje kuvugwa cyane nk’umwe mu bahabwa amahirwe yo kugera kure muri aya matora.
Libii ni umwe mu banyapolitiki bakiri bato bafite impinduramatwara ishingiye ku gukemura ibibazo by’urubyiruko n’ubukene, ndetse mu matora aheruka yo mu 2018 yabaye uwa gatatu.
Undi uhabwa amahirwe ni Joshua Osih wo mu ishyaka Social Democratic Front (SDF), risanzwe rizwi cyane nk’ishyaka rikomeye ritavuga rumwe na Leta kuva mu myaka ya 1990.Hari n’abandi banyapolitiki bakomeje guhatana barimo Serge Espoir Matomba (PURS), Hermine Patricia Ndam Njoya (UDC) na Akere Muna, umunyamategeko n’inzobere mu miyoborere myiza, bose bashaka kuzana isura nshya n’impinduka muri politiki ya Cameroun.
