Kuva mu mpera za Nyakanga 2025, urwego rw’igisirikare cya Repubulika Iharanira Demokarasi ya Congo rushinzwe ubugenzuzi ruri gukora iperereza ku buryo abasirikare b’iki gihugu bakuwe n’ihuriro AFC/M23 mu mijyi ya Bunagana, Goma, Bukavu n’ibindi bice byo mu burasirazuba bw’icyo gihugu.
Uru rwego ruyobowe na Gen Gabriel Amisi Kumba rukeka ko kuba aba basirikare baravuye muri ibi bice, abofisiye bakuru mu gisirikare cya RDC bashobora kuba barabigizemo uruhare, bityo ko bakwiye gusobanuzwa neza uko byagenze.
Gen Kumba yatanze urutonde rw’abofisiye bakuru ba RDC 25 bafite amapeti ari ku rwego rwa Général, bose bagize uruhare mu miyoborere y’urugamba, baba abakorera n’abakoreraga i Kinshasa, mu burasirazuba bw’igihugu n’ahandi.
Ku rutonde rw’ababazwa harimo Gen Christian Tshiwewe wabaye Umugaba Mukuru w’ingabo za RDC na Gen Franck Ntumba ushinzwe ibikorwa by’igisirikare mu biro by’umukuru w’igihugu. Aba batawe muri yombi mu kwezi gushize bakekwaho gushaka kugirira nabi Umukuru w’Igihugu.
Harimo kandi Umuvugizi w’ingabo za RDC wanakoreye mu burasirazuba bw’igihugu, Gen Maj Sylvain Ekenge Bomusa, Lt Gen Constant Ndima wayoboye Intara ya Kivu y’Amajyaruguru, Gen Chico Tshitambwe Jérôme na Lt Gen Padiri Bulenda David uyobora Inkeragutabara.
Gen Kumba yagaragaje ko iri perereza rizafasha igisirikare cya RDC kumenya aho intege nke z’abari ku rugamba zaturutse, gifate ingamba zatuma cyitwara neza.
AFC/M23 yafashe Bunagana muri Kamena 2022 nyuma y’amezi arindwi itangiye urugamba. Umuyobozi wayo, Corneille Nangaa, muri Kamena 2025 yasobanuye ko igenzura ibice bifite ubuso bwa kilometero kare ibihumbi 34.
