Nyuma yo kumubera ibamba akamwanikira muri Shampiyona y’Isi y’Amagare yabereye i Kigali, Tadej Pogačar yongeye kwereka igihandure Remco Evenepoel, amutwara umudali wa Zahabu wa Shampiyona y’Amagare i Burayi.
Kuri iki Cyumweru, tariki ya 5 Ukwakira 2025, ni bwo abakinnyi b’ibihangange bakomoka mu bihugu bitandukanye by’i Burayi bahanganiye Shampiyona y’Isi y’Amagare.
Abakinnyi bari bahanganye ni Umunya-Slovenia, Tadej Pogačar, Umubiligi Remco Evenepoel n’Umunya-Denmark, Jonas Vingegaard, utarakiniye i Kigali ahanini ashaka kuzitwara neza muri iri rushanwa ryabereye mu Bufaransa.
Ubwo isiganwa ryaburaga ibilometero 109, Jonas Vingegaard yasigaye bagenzi be barakomeza, ihangana risigara hagati y’abakinnyi bari i Kigali byahaye amahirwe Pogačar kwitwara neza.
Uyu mukinnyi uyoboye abandi ku Isi kugeza ubu, yavuye mu gikundi asiga bagenzi be uhereye ku bilometero 75, arinda agera aho isiganwa ryasorejwe akoresheje amasaha ane n’iminota 59.
Evenepoel yageze Ardèche hasorejwe isiganwa ari uwa kabiri arushwa amasegonda 31, ahabwa umudali wa Feza, mu gihe umukinnyi wa gatatu yabaye Umufaransa Seixas Paul warushijwe iminota itatu n’amasegonda 41.
Tadej Pogačar w’imyaka 27 akomeje kugira umwaka mwiza wa 2025, aho uyu mudali wa Zahabu wiyongereye ku wa Tour de France yatwaye ku nshuro ya kane, na Shampiyona y’Isi y’Amagare yatwaye ku nshuro ya kabiri yikurikiranya.
