Perezida wa Amerika, Donald Trump yatangaje ko yasabye Minisiteri y’Intambara kohereza mu mujyi wa Portland, muri Leta ya Oregon, kurinda ibikorwaremezo by’urwego rushinzwe abinjira n’abasohoka, no gukoresha imbaraga zose aho bikenewe barwanya abaterabwoba ba Antifa.
Ku wa 25 Nzeri 2025, Trump yabwiye abanyamakuru ko abantu yise ‘abasazi’ bateje imvururu bashaka gutwika inyubako za Leta muri Portland.
Abinyujije ku rubuga rwa Truth Social, ku wa 27 Nzeri 2025, Trump yavuze ko abisabwe na Minisiteri y’Umutekano mu gihugu, agiye koherezayo ingabo zo kurwanya abaterabwoba ba Antifa n’abandi.
Ati “Ku busabe bwa Minisitiri w’Umutekano imbere mu gihugu, Kristi Noem, ngiye gusaba Minisitiri w’Intambara, Pete Hegseth, kugira ngo atange Ingabo zose zikenewe zo kurinda umujyi wa Portland wangijwe n’intambara, ndetse n’inyubako zacu z’Urwego Rushinzwe abinjira n’abasohoka bishobora kugabwaho ibitero na Antifa n’abandi baterabwoba b’imbere mu gihugu.”
Reuters yanditse ko yagerageje kuvugisha meya w’umujyi wa Portland, Keith Wilson, ntiyagira icyo abasubiza.
